नेपालले युएईलाई दिएको २०१ रनको लक्ष्य

दिपेन्द्र सिंह ऐरीको अर्धशतकको मद्दतले नेपालले शनिबार त्रिभुवन विश्वविद्यालय अन्तर्राष्ट्रिय क्रिकेट मैदानमा आईसीसी पुरुष क्रिकेट विश्वकप लिग २ अन्तर्गत युएईलाई २०१ रनको लक्ष्य दिएको छ। ६३ रनको लाइफलाइन दिएका ऐरीले ९० बलमा पाँच चौका र दुई छक्का प्रहार गर्दै ७५ रन बनाए। उनी आउट हुने अन्तिम ब्याट्सम्यान थिए । यो उनको छैटौं अर्धशतक थियो। नेपालले पहिलो ओभरमा आठ रन बनाए पनि त्यसपछि संघर्ष गर्नुपरेको थियो । दोस्रो ओभरमा खुजाइमा तन्वीरले आसिफ शेखलाई ७ रनमा बोल्ड गरे। भीम सार्कीले १६ बलमा दुई चौकासहित १० रन बनाए भने ओपनर कुशल भुर्तेलले २५ बलमा चार चौकासहित २४ रन बनाए। कप्तान रोहित पौडेल २ रनमा लेग बिफोर विकेट (LBW) मा फसेपछि नेपाल ४९–४ मा सिमित भयो । ऐरी र बसिर अहमदले पाँचौं विकेटका लागि ४१ रन जोडेर इनिङ्सलाई स्थिरता दिलाएका थिए । ४७ बलको सामना गर्दै तीन चौका प्रहार गरेका अहमद २० रनमा एलबीडब्ल्यू आउट भएका थिए । आरिफ शेख र सोमपाल कामीले १५ रन बनाए । ऐरी र करण केसीले आठौं विकेटका लागि ४२ रनको साझेदारी गरे । केसीले ३७ बलमा एक चौका र एक छक्कासहित २२ रन बनाए । सन्दीप लामिछाने २ रनमा आउट भए । युएईका लागि जुनैद सिद्दिकी र आयान खानले ३–३ विकेट लिए । सिद्दिकीले ९.२ ओभरमा ३३ रन दिए जसमा तीन मेडन थिए भने खानले ९ ओभरमा एक मेडनसहित ३४ रन दिए । तनवीरले दुई विकेट लिए